IRIM судалгааны хүрээлэн 2013 оноос эхлэн нийгмийн хариуцлагын хүрээнд социологи, нийгмийн шинжлэх ухаанаас бусад салбарт мэргэжил эзэмшиж буй оюутан залуучуудад судалгааны суурь мэдлэг, ур чадвар олгох зорилготой “Судлаач Оюутан” хөтөлбөрийг жил бүр хэрэгжүүлж ирсэн.

Энэ жилийн ээлжит хөтөлбөр нь байгаль орчин, уур амьсгалын асуудлыг хөндөн “Уур амьсгалын өөрчлөлт нийгмийн сайн сайхан байдалд нөлөөлөх нь” сэдвийн дор амжилттай зохион байгуулагдаж дууслаа. Хөтөлбөрт нийт 83 оюутан материалаа ирүүлснээс эрх зүй, олон улсын харилцаа, эдийн засаг чиглэлийн 8 оюутан шалгарч  6 долоон хоногийн хугацаанд дараах үйл ажиллагаанд хамрагдлаа.  

1. Уур амьсгалын өөрчлөлт, нийгмийн сайн сайхан байдлын сэдэв болон судалгааны арга зүй, дизайн, мэдээлэл цуглуулах аргачлал, өгөгдлийн шинжилгээний цуврал сургалтуудад хамрагдаж;
2. Байгууллага дээр хэрэгжсэн судалгааны төслүүд, тэдгээрийн туршлага, сургамжуудтай танилцан;
3. Туршлагатай ахлах судлаачид бүхий менторуудаар удирдуулан, багт хуваагдан сонгосон сэдвээрээ судалгааны төсөл хамтран хэрэгжүүлж судалгааны чиглэлийн мэдлэг ур чадвар, туршлагаа нэмэгдүүлэв.

Далайд дусал нэмэр болж ирээдүйд улс эх орныхоо хөгжилд хувь нэмрээ оруулах салбар бүрийн залуу боловсон хүчнийг чадавхжуулахад тус хөтөлбөр нь бага боловч хувь нэмэр оруулсан гэдэгт IRIM судалгааны хүрээлэнгийн хамт олон итгэлтэй байна. Хөтөлбөрийн туршид идэвх, зүтгэлтэй оролцсон нийт оюутан залуучууддаа сурлага, хөдөлмөрийн өндөр амжилтыг хүсэн ерөөе!